O furtivismo mariño e a súa incidencia na Comunidade Autonóma de Galicia

A loita contra o furtivismo foi un dos obxectivos prioritarios da Consellería do Mar, desde a súa constitución en abril de 2009, xa que estas prácticas ilícitas constitúen un dos principais problemas aos que se enfronta o sector pesqueiro e marisqueiro galego.

Logo de que nos últimos anos proliferasen estas actividades irregulares, que entrañan en moitos casos graves riscos para a saúde dos consumidores e importantes perdas aos profesionais do mar, desde a administración autonómica actuouse con celeridade, para deseñar un Plan de Loita contra o Furtivismo.

As operacións coordinadas entre a Xunta de Galicia, as Forzas e Corpos de Seguridade do Estado, os gardapescas e profesionais das confrarías deron os seus froitos e os resultados non se fixeron esperar. A actividade furtiva reduciuse notablemente en zonas emblemáticas como a Ría do Burgo ou a Ría de Ferrol, pero aínda queda moito por facer.

Con todo, o feito de que en moitos casos estas actividades ilícitas queden impunes ante a insolvencia e reincidencia dos seus autores, levou á Consellería do Mar a mostrar a súa preocupación e a emprender a procura dalgunhas propostas que, dalgún modo, resolvan a situación.